Шурӯъ аз 1-уми июни соли ҷорӣ дар қонунгузории Русия дар робита ба вуруд ва хуруҷи муҳоҷирон ба ин кишвар чанд тағйирот ба иҷро даромад. Аз ҷумла, муҳлати супоридани изи ангушт ва гирифтани акс дар марзҳои ин кишвар ва гузоштани дархости вуруд дар замимаи мобилии “RuID” на дертар аз 72 соат пеш аз сафар, то охири соли 2027 тамдид шуд.
Дар ин бора Намояндагии Вазорати кору муҳоҷирати Тоҷикистон дар Русия хабар дода, гуфтааст, ки қаблан муҳлати татбиқи ин талаботи озмоишӣ то 30-юми июн буд. Ҳоло он то охири соли 2027 тамдид карда, шаҳрвандони хориҷие, ки аз марзи Русия мегузаранд, дар сурати мавҷуд будани имкони техникӣ, бояд маълумоти биометрӣ (супоридани изи ангушт ва суратгирӣ)-ро анҷом диҳанд.
Ҳамчунин, онҳое, ки бидуни раводид ба ин кишвар ворид мешаванд, бояд на дертар аз 72 соат пеш аз сафар дар замимаи мобилии “RuID” худро сабти ном карда, сурат ва маълумоти биометриро боргузорӣ ва дархости вуруд пешниҳод кунанд.
“Онҳо бояд бо мақсади вуруд ва будубош дар қаламрави Русия дархост пешниҳод намоянд. Қаблан, то 1-уми июни соли 2026, муҳлати будубош барои ин гурӯҳи шаҳрвандон 90 рӯзро ташкил медод”,-навиштааст манбаъ.
Лоиҳаи таҷрибавии супоридани изи ангушт ва гирифтани акс дар марзи Русия ҳангоми вуруд ба ин кишвар соли 2024 ҷорӣ шуд ва дар аввал гуфта мешуд, ки то 1-уми декабри соли 2024 амал мекунад ва баъдан, то 30-юми июни соли 2026 тамдид карда шуд. Тибқи он ҳамаи шаҳрвандони хориҷие, ки тавассути фурудгоҳҳои Шереметево, Домодедово, Внуково, Жуковский ва гузаргоҳи мошингузари Маштаково (вилояти Оренбург) ворид ё хориҷ мешаванд, аз назорати биометрӣ мегузаранд.
Қаблан Вазорати рушди рақамии Русия қаблан изҳор дошта буд, ки агар ин таҷриба муваффақ шавад, қоидаҳои нав ба амалияи доимӣ табдил ёфта, раванди вуруди шаҳрвандони хориҷӣ ба кишварро ба таври назаррас соддатар мекунад.
Бояд гуфт, ки мақомоти Русия тайи ду соли ахир пайгирона сиёсати муҳоҷиратро шадид карда, барои кормандони хориҷӣ бештар талабот ва маҳдудиятҳои нав ҷорӣ мекунанд. Аз ҷумла, барои қонуншиканҳо руйхати шахсони таҳти назорат таҳия шуда, талабот дар бораи огоҳиномаи электронӣ пеш аз сафар ҷорӣ шуд.
