Душанбе. 30-юми май. «Азия-Плюс» — | Ташкилоти ҷамъиятии «Идораи ҳуқуқи инсон ва риояи қонуният» (BHR) бо дастгирии молиявии Сафоратхонаи ИМА дар Тоҷикистон аз моҳи июни соли 2011 лоиҳаи «Пешбарии стандартҳои байналмилалӣ дар Тоҷикистон дар соҳаи баёни озоди ақидаи худ»-ро амалӣ мегардонад.
Тавре аз намояндагии BHR дар Тоҷикистон иттилоъ доданд, дар доираи ин лоиҳа дар шаҳрҳои Душанбе ва Хӯҷанд қабулгоҳҳои ҳуқуқӣ барои расонидани ёрии ҳуқуқии ройгон ба намояндагони ВАО ва рӯзноманигорон оид ба масъалаи бадномкунӣ (диффаматсия) дар доираи қонунгузории гражданӣ ва ҷиноятии ҷумҳурӣ фаъолияташонро ба роҳ мемонанд.
Ба иттилои манбаъ, ба ғайр аз ин, оид ба ҳолатҳои алоҳида баҳри ҳимояи ҳуқуқ ва озодиҳои поймолшудаи ВАО ва рӯзноманигорон дар мақомотҳои ҳифзи ҳуқуқ ва судӣ, адвокатҳо пешниҳод мегарданд. Ҳамчунин, аз ҷониби кормандони BHR, ҳангоми муайян намудани ҳуқуқвайронкуниҳо дар соҳаи озодии сухан, шикоятҳои инфиродӣ ба Кумитаи СММ оид ба ҳуқуқи инсон, омода мегардад.
«Вазъи озодии сухан дар Тоҷикистон бениҳоят мушкил аст. Масоили мушкилтарин, ки боиси ташвиши иттиҳҳоди рӯзноманигорон ва ташкилотҳои ҳуқуқҳифзкунанда гардидааст, ин таъқиби ҷиноятии намояндагони ВАО ва муроҷиатҳои шахсони мансабдори давлатӣ бо аризаҳои даъвогӣ нисбати ВАО ба мақомотҳои судӣ мебошад. Зиёдшавии миқдори аризаҳои даъвогӣ нисбати ВАО ба он оварда расонд, ки ВАО худро аз чопи мақолаҳои танқидӣ канорагирӣ намуда, бо ҳамин ба дараҷаи озодии сухан дар мамлакат таъсири манфӣ мерасонад. Бинобар ин, аз нуқтаи назари мо, зарурати таъсис додани қабулгоҳҳои махсусгардонидашуда дар назди ташкилоти мо пеш омадааст, то ки рӯзноманигорон имконияти гирифтани ёрии ҳуқуқии ройгони фавриро аз ҳуқуқшиносони соҳибтаҷриба дошта бошанд» – қайд намуд директори BHR Наргис Зокирова.
Аз суханони Н. Зокирова бар меояд, ки мақсади стратегии лоиҳа – декриминализатсияи тӯҳмат ва таҳқир ҳамчун шакли ҷазои ҷиноятӣ мебошад, зеро вуҷуд доштани ин моддаҳо озодии суханро дар Тоҷикистон бениҳоят маҳдуд месозанд. «Барои амалӣ гардонидани ин ташаббус мо нақша дорем, бо шариконамон, ки ташкилотҳои медиавиро намояндагӣ мекунанд, ба монанди АМВАОТ (Анҷумани мииллии воситаҳои ахбори оммаи мустақили Тоҷикистон), ХОМА, Internews Network дар Тоҷикистон ва ғайра ҳамкорӣ намоем», – афзуд ӯ.
