Душанбе. 14-уми июн. «Азия-Плюс» — | Сармеъмори шаҳри Душанбе Қудратулло Файзуллоев дар сӯҳбат бо хабарнигори ОИ «Азия-Плюс» изҳор кард, ки овозаҳои кӯчонидани бозори «Корвон» ҳеҷ асоси воқеъие надоранд.
Вай мегӯяд, бозори «Корвон» дар тавозуни шаҳрдорӣ қарор дорад ва то имрӯз чунин масъала дар сатҳи шаҳрдорӣ баррасӣ нашудааст. «Ба ман ҳамчун сармеъмори шаҳр то ҳол чунин иттилоъ нарасидааст», – иброз намуд ӯ.
Номбурда ҳамчунин афзуд, «агар замоне чунин тасмим гирифта шавад ҳам, аҳолии пойтахт пешакӣ аз он огоҳ карда мешаванд».
Қобили зикр аст, ки рӯзҳои ахир миёни сокинони шаҳри Душанбе чунин овозаҳое пайдо шудаанд, ки гӯё баъди чанде бозори «Корвон» кӯчонида шуда, қаламрави он ба ихтиёри яке аз воҳидҳои пойгоҳи низомии 201-уми Русия дода мешавад, ки дар қисмати ҷанубу ғарбии пойтахт ҷойгир аст.
Дар робита ба ин овозаҳо соҳибкорони бозори «Корвон» ба ташвиш афтодаанд, зеро метавонанд нуқтаҳои фурӯши худро аз даст диҳанд.
Бозори «Корвон» яке аз бозорҳои бузургтарин буда, бештари аҳолии пойтахт маҳз аз ин бозор молу маҳсулот мехаранд, зеро дар муқоиса бо бозорҳои дигар нарх дар он нисбатан арзон аст.
