Душанбе. 14-уми июн. «Азия-Плюс» — | Шурӯъ аз соли 2004 то 1-уми январи соли ҷорӣ ба мақомоти шаҳрдории Душанбе бобати ҷудо кардани қитъаҳои замин барои сохтмони манзили зисти инфиродӣ 25 ҳазору 495 нафар сокинони пойтахт муроҷиат кардаанд.
Тавре ба ОИ «Азия-Плюс» котиби матбуотии раиси шаҳри Душанбе Шавкат Саидов иттилоъ дод, чанде қабл мақомоти шаҳрдорӣ аризаҳои дар робита ба ин масъала воридшударо ҷиҳати омӯзиши дақиқ ба унвони комиссияҳои ҷамъиятии назди маъмурияти ноҳияҳои пойтахт ирсол кардааст.
Аз ин рӯ, мақомоти шаҳрдории пойтахт аз ҳамаи шаҳрвандоне, ки ба таври хаттӣ то 1-уми январи соди чорӣ дар бораи ҷудо кардани қитъаи замин барои сохтмони манзили зист муроҷиат карда буданд, хоҳиш мекунад, дар ин хусус ба ҳукуматҳои ноҳияҳо муроҷиат намоянд.
Ба қавли Саидов, бо назардошти анҷоми корҳои пажӯҳишӣ, оғози амалисозии Нақшаи генералии шаҳри Душанбе ва омодасозии нақшаи марҳилаи дуюми сохтмони манзили зисти инфиродӣ дар маҳаллаи Ховарон, бо қарори комиссияҳои ҷамъиятии назди ҳукуматҳои ноҳияҳои пойтахт, муроҷиаткардагон метавонанд барои сохтмони манзили зист соҳиби 0,3 га қитъаи замин шаванд.
