Қӯрғонтеппа. 21-уми июл. «Азия-Плюс» — | Соли равон дар рӯдхонаву обанборҳои ҷумҳурӣ 63 нафар ғарқ шуданд, ки нисбат ба ҳамин давраи соли гузашта қариб ду баробар зиёдтар аст. Дар ин бора ба ОИ «Азия-Плюс» аз Кумитаи ҳолатҳои фавқулодда ва мудофиаи граждании ҷумҳурӣ хабар доданд.
Дар ҳамин ҳол, соли равон дар иншооти обии вилояти Хатлон 11 нафар ба ҳалокат расиданд.
Тавре ба ОИ «Азия-Плюс» сардори ситоди ҲФ ва МГ-и вилояти Хатлон Ҳокимшо Шарифов иттилоъ дод, сабаби аслии ба ҳалокат расидани шаҳрвандон – интихоби ҷойи ноқулай оббозӣ ва беэҳтиётии онҳо аст.
Ба қавли Ҳ.Шарифов, қаблан ситод бо таҷҳизот барои баргузории корҳои ҷустуҷӯйӣ ва наҷотдиҳӣ таъмин набуд. «Чанде қабл Барномаи рушди СММ ба мо ду комплекти таҷҳизоти «Водолаз» тақдим намуд ва акнун имконоти наҷотдихандагони вилоят бештар гардида, ғаввосон тамоми фасли сол метавонанд дар чуқурии зиёд кор кунанд», – гуфт ӯ.
Дар робита ба афзудани шумори ғарқи одамон дар об, наҷотдиҳандагон бори дигар аз шаҳрвандон дархост мекунанд, ки ҳангоми истироҳат ва оббозӣ қоидаҳои бехатариро риоя намуда, мувофиқи имкон макони оббозии иҷозатдодашударо интихоб созанд.
