Дар ноҳияи Восеъи вилояти Хатлон миқдори зиёди маводи мухаддири афюн ва гурӯҳи каннабис мусодира гардид.
Тавре ба ОИ «Азия-Плюс» аз Вазорати корҳои дохилии ҷумҳурӣ хабар доданд, дар натиҷаи як амалиёти муваффақона ба гумони даст доштан дар муомилоти ғайриқонунии маводи мухаддир сокини маҳаллӣ К.В. боздошт шудааст.
«Зимни азназаргузаронии автомашинаи тамғаи Mersedes, таҳти идораи боздоштшуда қарор дошт, кормандони милиса бастаҳои дорои ҳудуди 27 кило маводи мухаддири гурӯҳи каннабис ва 7 кило афюнро дарёфт ва мусодира намуданд», – гуфтанд дар вазорат.
Бино ба иттилои манбаъ, вазни умумии маводи мухаддири мусодирашуда ҳудуди 34 килоро ташкил додаст. «Аз рӯйи ин далел парвандаи ҷиноӣ боз шуда тафтишот идома дорад», – афзуд сарчашма.
Дар зарфи 8 моҳи соли равон дар қаламрави ҷумҳурӣ аз муомилоти ғайриқонунӣ 3 тоннаву 152 кило маводи мухаддир мусодира гардидааст, ки нисбат ба ҳамин давраи соли гузашта ба андозаи 31,5% бештар аст.
