Кишоварзони Тоҷикистон ният доранд, ки ахири ҳафтаи равон аз иҷрои нақшаи ҷамъоварии пахта мужда расонанд. То имрӯз аз заминҳои кишти пунбадона 372 ҳазору 825 тонна ҳосил ҷамоварӣ гардидааст, ки 95,6%-и нақшаи пешбинишударо ташкил медиҳад.
Бино ба маълумоти Вазорати кишоварзии ҷумҳурӣ, ин нишондиҳанда нисбат ба хамин давраи соли гузашта ба миқдори 131,7 ҳазор тонна зиёдтар аст. Рӯзи 10-уми октябр пахтакорони кишвар ба миқдори 1,2%-и нақша ҳосил ғундоштанд.
То ба имрӯз деҳқонони вилояти Хатлон 251,4 ҳазор (96,5%-и нақша), Суғд 98,1 ҳазор (93,5%-и нақша) ва ноҳияҳои тобеи марказ 23,2 ҳазор тонна (95,2%-и нақша) ҳосили пахта ҷамъоварӣ карданд.
Аллакай 18 ноҳияи пахтакори кишвар аз ӯҳдаи иҷрои нақша бо сарбаландӣ баромада, айни замон илова ба нақша ҳосил меғундоранд.
Соли равон дар Тоҷикистон бояд 390 ҳазор тонна ҳосили пунбадона ҷамъоварӣ гардад, ки нисбат ба соли гузашта 80 ҳазор тонна бештар аст. Аммо дар Вазорати кишоварзии ҷумҳурӣ мӯътақиданд, ки соли ҷорӣ дар ҷумҳурӣ зиёда аз 420 ҳазор тонна ҳосили пахта ҷамъоварӣ хоҳад шуд. Бори нахуст дар таърихи истиклолияти кишвар пахтакорон дар нимаи моҳи октябр нақшаи ҷамъоварии пахтаро ба иҷро мерасонанд. Маъмулан нақша моҳи ноябр ба иҷро мерасид. Ҳосили пунбадона то боридани барфи аввал ҷамъоварӣ мегардад.
