Мусофирони хатсайри ҳавоии Хуҷанд-Душанбе, ки мебоист шоми рӯзи 20-уми май тавассути ҳавопаймои ширкати «Тоҷик-Эйр» ба Душанбе парвоз мекарданд, бинобар сабаби номусоидии обуҳаво, шабро дар толори интизории фурудгоҳ рӯз карданд.
Мусофирон аз таъмин накардани онҳо бо оби нӯшокӣ, хӯроки гарм ва ҷойи истироҳат дар муддати 7 соат шикоят карданд.
Ба идораи ОИ «Азия-Плюс» нусхаи аризаи мусофирон ба унвони прокуратураи нақлиёти ноҳияи Бобоҷон Гафуров дастрас гардид, ки дар он бобати вазъи рухдода муфассал маълумот дода мешавад.
«Соати 20-у 30 дақиқаи вақти маҳаллӣ мо бояд ба Душанбе парвоз мекардем, вале ба иллати номусоидии обуҳаво парвоз ба таъхир гузошта шуд. Бо гузашти ҳар соате ба мо эълон мекарданд, ки парвози ҳавопаймо боз ба муддате мавқуф гузошта мешавад. Дар натиҷа мо бидуни оби ошомиданиву хӯроки гарм 7 соатро дар толори сарди интизории фурудгоҳи Хуҷанд гузаронидем. Миёни мо кӯдакону пиронсолон ва шаҳрвандони хориҷӣ ҳузур доштанд», – изҳор кардаанд мусофирон дар ариза.
Онҳо шабона ба намояндаи ширкати «Тоҷик Эйр» муроҷиат намудаанд, вале аз ӯ ҷавоби қаноатбахшеро интизор нашудаанд.
«Мусофирон тамоми шаб бо мушкилоти зиёде мувоҷеҳ гардиданд. Ҳатто ба мусофироне, ки ҳамроҳашон кӯдак доштанд, дар ҳуҷраи модару кӯдак ҷой дода нашуд. Мо аз беамалии ширкати масъули ҳамлу нақл хеле ошуфтаву дар тааҷҷубем», – изҳор кард ба ОИ «Азия-Плюс» яке аз мусофирони хатсайри ҳавоии Хуҷанд-Душанбе Дмитрий Прудских.
