Дар минтақаи шимоли ҷумҳурӣ ба иттиҳоми муомилоти ғайриқонунии маводи мухаддир як сокини шаҳри Қӯрғонтеппа, зани 40-сола ба 9 соли зиндон маҳкум гардид.
Суди шаҳри Хуҷанд ӯро дар содир намудани ҷиноёт мутобиқи моддаҳои 200, қ. 3 (Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан) ва 32, қ. 3 – 289, қ. 2 (Тайёрӣ ба ҷиноят ва суиқасд ба ҷиноят – Қочоқ) гунаҳкор донист.
Тавре ба ОИ «Азия-Плюс» аз суди шаҳри Хуҷанд итилоъ доданд, зан муҳлати ҷазоро дар зиндони низоми умумӣ адо мекунад.
Қобили зикр аст, ки М.Ш.-и 40-сола аз ҷониби мақомоти ҳифзи ҳуқуқи вилояти Суғд санаи 27-уми майи соли равон дар микрорайони 34-уми шаҳри Хуҷанд боздошт гардида буд. Ҳангоми кофтуков аз ӯ ба миқдори беш аз ним кило маводи мухаддири сахттаъсири героин дарёфт ва мусодира гардид, ки ӯ онро дар дохили меъдааш тавассути ҳавопаймо ба Русия интиқол доданӣ будааст. Барои иҷрои ин кор ба ӯ 10 ҳазор доллари ИМА ваъда додаанд.
