Дар гузориши ЮНЕСКО таҳти унвони «Истифодаи маълумот дар амал» гуфта мешавад, қариб чор миллион нафар шаҳрвандони ҷавони кишварҳои минтақаи Осиёи Марказӣ ва ҳамчунин Аврупои Марказиву Шарқӣ маълумоти ибтидоӣ надошта, аз малакаҳои касбӣ бархӯрдор нестанд.
Дар гузориш зикр мегардад, ки ин нафарон ба имкони алтернативии азхудкунии малакаҳои заминавӣ барои пайдо кардани ҷойи кор ва даромад ниёз доранд.
«Барои пайдо намудани ҷойи кори шоиста ба ҷавонон малакаҳое заруранд, ки онҳо дар мактаби ибтидоӣ азхуд мекунанд. Ҳалли ин масъала дар ояндаи наздик ба гумон аст. Дар ин минтақаҳо зиёда аз 1 млн. нафар кӯдакон ва 1,5 млн. нафар наврасон аз таҳсил дар мактабҳо канор мондаанд», – омадааст дар гузориш.
Муаллифони гузориш ба кишварҳои ин минтақаҳо тавсия додаанд, ки барои азхудкунии малакаҳои бунёдӣ ба ҷавонон шароит фароҳам оваранд.
