Ҳимоятгарони журналисти хабаргузории ВВС Искандари Фирӯз, ки аввали моҳи октябр бар асари садамаи нақлиёт ҷароҳатҳои вазнин бардошт, аз ба дарозо кашидани ҷараёни тафтиши парвандаи ҷиноии мазкур изҳори нигаронӣ мекунанд.
Тавре ба ОИ «Азия-Плюс» яке аз ҳимоятгарони журналист Саидбек Фозилов хабар дод, танҳо пас аз гирифтани хулосаи айбнома онҳо ба шиносоии пурра бо маводи парванда ҳуқуқ доранд ва агар ҳамин ҳафта тафтиши парванда анҷом наёбад, онҳо аз болои муфаттишон ба Прокуратураи генералӣ шикоят хоҳанд бурд, зеро натиҷаҳои ташхис аллакай маълуманд.
Ба қавли ҳимоятгар, онҳо дархост кардаанд, ки маблағи зарар, аз ҷумла зарари моддӣ низ муайян карда шавад. «Аз ВКД ба мо изҳор карданд, ки ин дархост баррасӣ мешавад, вале аз маблағи муқарраршудаи зарар ҳарфе нагуфтанд», – иброз дошт вай.
Ҳимоягари журналист аз оғози парвандаи ҷиноӣ танҳо мутобиқи моддаи 212, қ. 2-и КҶ ҶТ ( Вайрон кардани қоидаҳои ҳаракатӣ роҳ ва истифодаи воситаҳои нақлиёт) розӣ нест. Ӯ мегӯяд, ба парвандаи ҷиноӣ бояд моддаи 127 (Дар хатар монондан) низ ҳамроҳ гардад, зеро гунаҳкори садама аз ҷойи ҳодиса ғайб зада, журналисти осебдида ва писари ӯро дар ҳолат вазнини бидуни кӯмак гузошт.
Тавре ба ОИ «Азия-Плюс» аз Раёсати тафтишоти ВКД иттилоъ доданд, тафтишоти парвандаи мазкур дар марҳилаи хотимавӣ қарор дошта, чунин парвандаҳо ба иллати баргузории ташхисҳои зиёд ба муддати зиёд тӯл мекашанд, зеро танҳо ҳамин ҳафта 6 маротиба ташхис гузаронида шудааст.
Айни замон Искандари Фирӯз дар дармонгоҳи «Сино» қарор дошта, табибон ҳолати ӯро ҳамоно вазнин арзёбӣ мекунанд. «Ҳозир журналистро барои баргузории ҷарроҳии пояш омода мекунем, ки бояд ҳафтаи оянда сурат гирад», – гуфтанд табибон.
Ёдрас мекунем, ки шоми рӯзи 9-уми октябр ҳангоми ҳаракат дар хиёбони Исмоили Сомонӣ ронандаи автомашинаи тамғаи «Тойота-Ландкурузер» аз уҳдаи идораи воситаи нақлиёт набаромада, ба самти муқобили ҳаракати роҳ баромада, ба автомашинаи тамғаи «Тойота-Камри» таҳти идораи ҳамсоли худ Ҷавоншери Фирӯз бармехӯрад. Бар асари ин бархӯрд ду мусофири автомашинаи «Тойота-Ландкрузер», ронандаи автомашинаи «Тойота-Камри» ва мусофири он – журналисти 46-солаи хадамоти форсии хабаргузории ВВС Искандари Фирӯз ҷароҳатҳои гуногуни ҷисмонӣ бардошта, дар беморхона бистарӣ шуданд.
Чанде қабл вазири корҳои дохилии Тоҷикистон Рамазон Раҳимов ба Раёсати тафтишотӣ ва Раёсати БДА ҷиҳати таҳқиқи дақиқи ҳодисаи садамаи нақлиёт, ки аз он хабарнигори Би-Би-Сӣ Искандари Фирӯз осеб дид, супориш дода буд. Бо назардошти изҳороти созмонҳои журналистии Тоҷикистон (11-уми октябр) бобати тафтишоти мӯшикофонаи ин ҳодиса, вазир ҷараёни таҳқиқи ин қазияро таҳти назорати худ қарор дод.
Мақомоти раҳбарии БДА ВКД Тоҷикистон пас аз ташхис эълон дошт, ки гунаҳкори садама ронандаи автомашинаи «Тойота-Ландкрузер» Насрулло Шарифов аст, ки қаблан худро бо номи Айёмиддин Раҳмиддинзода муаррифӣ мекард. Ба гунаҳкори садама чораи ба ҳабс гирифтан татбиқ нашудааст.
