Хатмкардагони макотиби олии Русия, ки бояд ба макотиби таҳсилоти умумии Тоҷикистон баҳри омӯзиши забони русӣ ба толибилмони тоҷик сафарбар мешуданд, бо сабабҳои номаълум то ҳол ба Тоҷикистон наомадаанд.
Тибқи қарордод миёни Вазоратҳои маорифи Тоҷикистону Русия, дар оғози соли нави хониш бояд ҳудуди 300 нафар омӯзгорони забони Русия ба макотиби таҳсилоти умумии Тоҷикистон сафарбар мешуданд.
Дар Раёсати муносибатҳои байнулмилалии Вазорати маорифи ҷумҳурӣ дар ин робита мегӯянд, қарордод дар ин бора моҳи апрел бо вазири собиқи маорифи Русия Андрей Фурсенко ба имзо расида, моҳи май Дмитрий Ливанов вазири нави маорифи Русия таъин шуд ва шояд ӯ ба ин қарордод расидагӣ накарда бошад.
«Вале ин танҳо як тахмин буда, сарфи назар аз ирсоли тамоми асноди дахлдор ба мақомоти марбутаи Русия, мо то ҳанӯз посухӣ расмӣ нагирифтаем», – гуфт як манбаъ дар Раёсати мазкур.
Ба иттилои ин манбаъ, дар Вазорати маориф бо назардошти норасоии мутахасисони ин фан, рӯйхати ба кадом минтақа ва то чанд нафар омӯзгори забони русӣ фиристодан аз ҳисоби муаллимони Русия таҳия гардидааст.
Қобили зикр аст, ки масъалаи ҷалби омӯзгорони забони русӣ аз Русия ба фаъолият дар макотиби таҳсилоти умумии Тоҷикистон муддати се сол мавриди баррасӣ қарор дошт ва танҳо моҳи апрели соли равон ҷонибҳо ба мувофиқа расида, дар ин хусус қарордоди дахлдор ба имзо расид.
Ҷониби Русия ба омӯзгорон таъминот бо як қатор имтиёзотро ваъда дода, Тоҷикистон масъалаи таъмин бо музди меҳнат ва манзили зисти муваққатиро ба уҳда гирифт. Омӯзгорони Русия бояд ҳанӯз тобистон ба Тоҷикистон меомаданд ва мебояд гуфт, дар Тоҷикистон онҳоро интизорӣ доштанд.
