Кӯлоб. 24-уми июл. ОИ «Азия-Плюс» – Дар шаҳри Кӯлоб иҷлосияи 18-уми Маҷлиси вакилони халқи шаҳр ба анҷом расид.
Дар иҷлосия дархости додситони вилояти Хатлон ҷиҳати иҷозати оғози парвандаи ҷиноии муовини Маркази солимии репродуктивӣ ва танзими оила, намояндаи мардумии маҷлиси вакилони халқи шаҳри Кӯлоб Фариштамоҳ Солеҳова мавриди баррасӣ қарор гирифт.
Ба гуфтаи додситони шаҳр, мушовири адлияи дараҷаи аввал Насрулло Маҳмудов, намояндагони мардумӣ иҷозаи худро доданд ва аз ин пас тафтишот шурӯъ мегардад.
Ёдрас мекунем, ки кормандони додситонии минтақавии Кӯлоб Ф.Солиҳоваро ҳангоми гирифтани пора боздошт намуданд. Ӯ аз шавҳари як сокини маҳаллӣ Надежда Шамсиева барои ба дунё овардани кӯдакаш 400 сомонӣ тамаъ кардааст, вале кӯдак фавтида таваллуд мешавад. Чун Ф.Солеҳова намояндаи мардумии маҷлиси вакилони халқи шаҳр аст, ӯро аз боздоштгоҳи муваққатӣ дар зарфи 24 соат ҷавоб дода, бобати қаламрави кишварро тарк накарданаш тааҳҳуднома гирифтанд.
