Душанбе. 20-уми август. ОИ «Азия-Плюс» – Шариф Комилзода, мудири китобхонаи давлатии миллии Тоҷикистон ба номи Абулқосим Фирдавсӣ изҳор дошт, ки имрӯз зимни баргузории конфронси назарияву илмӣ мулоқоти хонандагон бо пажӯҳишгарони фаъолияту эҷодиёти асосгузори адабиёти форсу тоҷик Абӯабдулло Рӯдакӣ доир мегардад.
«Ба ифтихори ҷашни 1150-умин солгарди Одамушшуаро дар китобхона намоишгоҳи асарҳои бахшида ба ҳаёту эҷодиёти шоир ташкил карда мешавад», – гуфт ӯ.
Мавсуф мегӯяд, ки конфронсро Вазорати фарҳанг созмон дода, дар он оид ба ҳаёту эҷодиёти Абӯабдулло Рӯдакӣ доктори улуми филология Қурбон Восеъ, мушовири фарҳангии сафорати Афғонистон дар Тоҷикистон Шамсулҳаққи Ориёнфар ва дигар адбиётшиносони маъруф маърӯза хоҳанд кард.
