Душанбе. 4-уми декабр. ОИ «Азия-Плюс» – Имрӯз дар Вазорати умури дохилии ҷумҳурӣ маросими аз ҷониби Барномаи рушди СММ супурдани таҷҳизоти дафтари корӣ ба вазорати мазкур ба маблағи $25 ҳазор доир гашт.
Тавре Сафарбек Солиев, мушовири робитаҳои хориҷии Барномаи рушди СММ ба ОИ «Азия-Плюс» хабар дод, кӯмаки техникӣ аз таҷҳизоти дафтари корӣ, мебел барои 5 утоқи дарсии вазорат, раёсатҳои умури дохилии вилоёти ҷумҳурӣ ва адабиёти махсуси соҳаи ҳуқуқшиносӣ барои кормандон иборат аст.
Номбурда ёдовар шуд, ки дар чаҳорчӯбаи лоиҳаи «Таҳкими сулҳ ва пешбурди рушди риояи ҳуқуқи инсон» барнома ҷиҳати рушди имконоту малакаҳои касбии кормандони мақомоти ҳифзи ҳуқуқи ҷумҳурӣ семинару тренингҳо доир сохта, ҳамчунин бо техникаву таҷҳизот ба онҳо кӯмак мекунад.
