Душанбе. 12-уми декабр. ОИ «Азия-Плюс» – Имрӯз дар шаҳри Душанбе Созмони ҷаҳонии беҳдошт гузориш оид ба нақши кӯмаки аввалияро таҳти унвони «Кӯмаки тиббииву санитарӣ имрӯз бештар муҳим аст» муаррифӣ мекунад.
Тавре аз Вазорати тандурустии ҷумҳурӣ ба ОИ «Азия-Плюс»хабар доданд, «гузориши мазкур имкон медиҳад, ки сабақҳои аз таҷрибаи пешина гирифтаро таҳлил намуда, барои фаъолияти минбаъда ва роҳи ҳалли вазифаҳо заминаи мусоид фароҳам оварда шавад. «Иҷрои тавсияҳои пешбинишуда ба коҳиши фарқ миёни нақшаву кори амалӣ мусоидат хоҳад кард», – гуфт сарчашма.
Бино ба иттилои манбаъ, дар гузориш маҷмӯи масоили ислоҳоти соҳа, ки беҳбуди кӯмаки тиббиву санитарӣ, интизориии шаҳрвандон аз он ва масоили умумии соҳаро дар бар мегирад, инъикос ёфтаанд. Интизор меравад, ки дар чорабинӣ намояндагони вазорати тандурустӣ, Созмони ҷаҳонии беҳдошт ва созмонҳои байнулмилалии марбут ба ин соҳа ширкат хоҳанд варзид.
