Душанбе. 24-уми июл. ОИ «Азия-Плюс» – Дар нимсолаи аввали соли ҷорӣ дар ҷумҳурӣ зиёда аз 88 ҳазор ҷойҳои кории нав ташкил гардид, ки дар муқоиса бо ҳамин давраи соли гузашта 35 ҳазор бештар буда, 59 дарсади нақшаи «Барномаи мусоидат ба шуғли аҳолии ҶТ барои солҳои 2008-2009»-ро ташкил медиҳад.
Чанде қабл зимни як нишасти матбуотӣ вазири меҳнат ва ҳифзи иҷтимоии аҳолии ҶТ Шукурҷон Зуҳуров изҳор дошт, ки дар давоми соли ҷорӣ 386 ярмаркаҳои ҷойҳои кории холӣ ва вазифаҳои озод доир гардида, 34 ҳазору 400 нафар шаҳрвандони бекор бо ҷойи корӣ таъмин карда шуданд.
«Аксари корёфтагон дар ин ярмаркаҳо бинобар паст будани ҳаҷми музди меҳнат муддати зиёде дар ҷойи нави корӣ фаъолият накарда, боз ба сафи бекорон баргаштанд», – гуфт ӯ.
Вазир афзуд, дар ин давра дар мақомоти шуғли аҳолии ҷумҳурӣ 44,6 ҳазор нафар шаҳрвандони бекор ба қайд гирифта шудаанд.
