Душанбе. 28-уми июл. ОИ «Азия-Плюс» – Имрӯз миёни Дафтари Созмони Амният ва Ҳамкории Аврупо (САҲА) дар Тоҷикистон ва Сарраёсати нерӯҳои марзбонии Кумитаи давлатии амнияти миллии ҶТ оид ба таъмини роҳандозии барномаи омодагии ҳамаҷониба ба таҳкими имконоти идоракунӣ дар назорат ва ҳифзи марзҳо Ёддошти тафоҳум ба имзо расид.
Чӣ тавре ки ба ОИ «Азия-Плюс» аз Дафтари САҲА дар ҶТ иттилоъ доданд, дар ҷараёни амалисозии барномаи яксола бо ҳайати шахсии нерӯҳои марзбонии ҷумҳурӣ оид ба барномасозӣ ва идоракунӣ, тарзи роҳбарӣ ба ҳайатҳои назорати марз, расонидани кӯмаки аввалияи тиббӣ ва ҳифзи сарҳад дар шароити зимистон машғулиятҳо баргузор мешаванд. «Татбиқи барнома марзбононро тавассути такмили низоми назорат бо маҳорату қобилиятҳои зарурии таҳкими имконоти нерӯҳо баҳри пешгирии убури ғайриқонунии марзи давлатӣ таъмин месозад», – изҳор дошт роҳбари Дафтари САҲА дар Тоҷикистон
Владимир Пряхин.
Дар анҷоми барнома Дафтари САҲА таҷҳизот ва амволеро, ки зимни татбиқи лоиҳа истифода шудааст, ба марзбонони тоҷик тақдим хоҳад кард.
