Душанбе. 27 апрел. «Азия-Плюс» – | Корманди Вазорати маорифи Тоҷикистон дар сохтани номаҳои камоли қалбакӣ гумонбар мешавад.
Тавре ба «АП» аз мақомоти ҳифзи ҳуқуқ иттило доданд, Ҷамолиддин Шарипови 30 сола ба ҳангоми адои вазифа дар вазорати маориф ба ҳайси мутахассиси пешбари шӯъбаи кадрҳо бо директори яке аз макотиби пойтахт ва муовни ӯ мувофиқа кардааст.
«Аз моҳи январи соли 2009 то августи соли 2010 Шарипов 1 ҳазору 165 номаи камоли тақаллубӣ, бар ивази 5 ҳазор сомонӣ сохтааст», – хабар медиҳад манбаъ.
Дар робита ба ин амал парвандаи ҷиноӣ боз шуда тафтишот идома дорад.
Тибқи маълумоти Оҷонсии мубориза бо фасод ва назорати моликияти давлатии Тоҷикистон, бахши маориф яке аз самтҳои фасодзадаи кишвар маҳсуб мегардад. Аксаран масъулони соҳаи маориф бо ҷурми ришваситонӣ, суйистифода аз мансаб, сохтани ҳуччатҳои тақаллубӣ боздошт карда мешаванд.
