Душанбе. 27-уми июл. «Азия-Плюс» — | Нимаи аввали имрӯз вазири корҳои хориҷии Афғонистон Залмай Расул ба шаҳри Душанбе ташриф меорад.
Тавре ба ОИ «Азия-Плюс» роҳбари департаменти иттилооти Вазорати корҳои хориҷии ҷумҳурӣ Давлат Назриев хабар дод, имрӯз вохӯрии вазирони корҳои хориҷии Тоҷикистону Афғонистон Ҳамрохон Зарифӣ ва Залмай Расул баргузор мешавад. «Дар мулоқот баррасии маҷмӯи васеъи масоили ҳамкориҳои дуҷониба дар бахшҳои иқтисод, амният, маориф ва тандурустӣ дар назар аст», – гуфт ӯ.
Бино ба гуфтаи Д. Назриев, дар доираи сафари вазири корҳои хориҷии Афғонистон ҳамчунин гуфтушуниди ӯ бо президенти Тоҷикистон Эмомалӣ Раҳмон ва раиси палатаи поёнии парлумони ҷумҳурӣ Шукурҷон Зуҳуров низ ба нақша гирифта шудааст.
