– Дар ҷаласаи фаврии Шӯрои амнияти миллии Ӯзбекистон, ки рӯзи сешанбе доир гардид, вазъи муносибатҳои кунунӣ бо Тоҷикистон мавриди баррасӣ қарор гирифтанд, – хабар медиҳад ОИ «Фергана».
Бино ба маълумоти оҷонсӣ, дар ҷаласа вазъи муносибатҳо бо кишвари ҳамҷавори Тоҷикистон, ки ахиран хеле муташанниҷ шудаанд, баррасӣ шудаанд.
Дар ҳамин ҳол, ОИ «Жаҳон»-и назди Вазорати корҳои хориҷии Ӯзбекистон менависад, ҷаласа таҳти раёсати президенти Ӯзбекистон, раиси Шӯрои амнияти миллӣ Ислом Каримов баргузор шудааст.
Гуфта мешавад, дар ҷараёни ҷаласа вазъи корҳо ва таҳдидҳо ба амният дар Ӯзбекистон ва минтақа ва ҳамчунин чораву тадбирҳои пешгирии онҳо мавриди таҳлил қарор гирифтаанд Дар ҷаласа роҳбарони ҳукумат ва мақомоти дахлдори Ӯзбекистон иштирок кардаанд.
Тибқи маълумоти ОИ «Фергана», ҷаласаҳои Шӯрои амнияти миллии назди президенти Ӯзбекистон хеле кам доир мегарданд ва ҷаласаи охири ин шӯро моҳи апрели соли 2009 баргузор шудааст.
Ёдрас мекунем, ки санаи 2-юми апрел дар сомонаи сафорати Тоҷикистон дар Русия дар робита ба муносибатҳои кунунии Тоҷикистону Ӯзбекистон як изҳорот нашр шуд.
Дар изҳорот зикр гардида буд, ки қатъи ҳаракати қатораҳо тавассути қитъаи роҳи оҳани Ғалаба-Амузанг, иҷро накардани уҳдадориҳо оид ба интиқоли газ ба Тоҷикистон, розӣ нашудан ба интиқоли барқ аз Туркманистон тавассути қаламрави худ, изҳори норозигӣ ба анҷоми сохтмони нерӯгоҳи Роғун, эълони ҷанги иттилоотӣ бо Корхонаи алюминии Тоҷикистон (ТАЛКО) бо баҳонаи ҳифзи муҳити зист, дархости ба моликияти Ӯзбекистон табдил додани обанбори Фарҳод бо қаламраваш, то ба ҳол аз минаҳо поккорӣ накардани 54 қитъаи марзҳои муштарак ва ғайра аз ҷумлаи мушкилоти миёни кишварҳост.
