Имрӯз вазири корҳои хориҷии Русия Сергей Лавров бо сафари дурӯзаи корӣ ба Тоҷикистон меояд. Сафари вазири корҳои хориҷии Русия дар остонаи 20-умин солгарди роҳандозии муносибатҳои дипломатӣ миёни Тоҷикистону Русия, ки 8-уми апрели соли 1992 барқарор шуда буданд, сурат мегирад.
Дар доираи сафари С.Лавров ба Душанбе дидору гуфтушунинди ӯ бо президенти Тоҷикистон Эмомалӣ Раҳмон, вазири корҳои хориҷии ҷумҳурӣ Ҳамрохон Зарифӣ ва дигар намояндагони мақомоти раҳбарии Тоҷикистон дар назар аст.
Бино ба маълумоти департаменти иттилооти Ваорати корҳои хориҷии Русия, дар гуфтушунидҳо баррасии масъалаҳои ҳамкориҳои дуҷониба дар бахшҳои сиёсиву иқтисодӣ ва гуманитарӣ ва ҳамчунин самтҳои муҳими ҳамкорӣ дар сохторҳои минтақавӣ, аз қабили ИДМ, Созмони аҳдномаи амнияти дастаҷамъӣ, Иттиҳоди иқтисодии Авруосиё (ЕврАзЭС) ва Созмони ҳамкории Шанхай ба нақша гирифта шудааст.
«Дар Русия мутмаинанд, ки сафари расмии вазири корҳои хориҷии Русия ба Тоҷикистон ба таҳкими муносибатҳои дӯстона ва шарикии сатратегӣ миёни кишварҳо саҳми арзанда хоҳад гузошт», – таъкид мегардад дар хабар.
Ёдрас мекунем, ки дар маросими ифтитоҳи бинои Филиали Донишгоҳи миллии тадқиқотӣ-технологии МИСиС дар шаҳри Душанбе президенти Тоҷикистон Эмомалӣ Раҳмон Русияро шарики асосии стратегии Тоҷикистон номбар карда, аз Русия даъват карда буд, ки манфиатҳои Тоҷикистонро ба инобат гирад. Ба гуфтаи сарвари давлати Тоҷикистон, Русия дар Тоҷикистон дорои иншоотест, ки дар дигар кишварҳои минтақи Осиёи Марказӣ мавҷуд нест. Ба сифати мисол Э.Раҳмон пойгоҳи низомии 201-ум ва маҷмааии кайҳонии «Окно»-ро номбар кард.
Бино ба маълумоти Агентии омори назди президенти ҶТ, Русия шарики пешсафи тиҷоратии Тоҷикистон мебошад. Ҳамин тариқ, аз рӯйи натиҷаҳои соли 2011 ҳаҷми муомилоти молӣ миёни кишварҳо беш аз 1 млрд. 36 млн. доллари ИМА-ро ташкил додааст, ки 961 млн. доллараш ба воридоти маҳсулот аз Русия рост меояд.
