Бар асари таркиш дар як корхона дар ноҳияи Қумсангир ду нафар ҳалок гардида, ду тан ҷароҳат бардоштанд.
Тавре ба ОИ «Азия-Плюс» раиси ноҳияи Қумсангир Холмурод Раҳмонов хабар дод, таркиш рӯзи 5-уми май дар корхонаи коркарди нафти «Сулола» воқеъ дар шаҳраки Нефтяник рух додааст.
Ба қавли Раҳмонов, тибқи маълумоти пешакӣ, таркиш дар натиҷаи риоя нашудани техникаи бехатарӣ ба вукуъ пайвастааст. «Дар ҷойи ҳодиса мақомоти дахлдор машғули кор буда, сабабҳо ва ҳаҷми зарар аз таркиш муайян карда мешаванд», – афзуд Раҳмонов.
Бино ба маълумоти расмӣ, корхонаи «Сулола» дар 10 километрии шаҳраки Дӯстӣ – маркази ноҳияи Қумсангир воқеъ буда, дар он ҳудуди 40 нафар машғули коранд. Дар корхона маводи сӯзишворӣ, аз қабили бензину солярка ва мазут истеҳсол мешавад.
Аз Вазорати корҳои дохилӣ иттилоъ доданд, ки кормандони хадамоти оташнишонӣ дарҳол ба ҷойи ҳодиса ҳозир шуда, гузаштани оташ ба дигар зарфҳои дорои маводи сӯзишвориро пешгирӣ кардаанд. «Айни замон корҳои тафтишотӣ идома доранд. Ҳолатҳои сар задани сӯҳтор ва ҳаҷми зарари расида муайян карда мешаванд», – гуфтанд дар вазорат.
