Рӯзи панҷшанбе Шӯрои мудирони Бонки ҷаҳонӣ ҷудо кардани бурси навбатӣ ба Тоҷикистон дар ҳаҷми 10 млн. доллари ИМА-ро маъқул шуморид.
Тавре дар иттилоияи бонк хабар дода мешавад, маблағи мазкур ба амалисозии лоиҳа оид ба баланд бардоштани рақобатпазирии бахши хусусӣ ва беҳбуди муҳити корӣ дар ҷумҳурӣ равона мегардад.
Дар иттилоия зикр мегардад, ки лоиҳаи мазкур ба содакунии тартибот оид ба сабти тиҷорат ва дастрас кардани иҷозат барои сохтмон, беҳбуди зербинои молиявӣ барои таъмини дастрасии беҳтар ба хизматгузориҳои молиявӣ ва ҳамчунин мусоидат ба рушди саноати кӯҳкории ҷумҳурӣ, ки Тоҷикистон дар он афзалият дорад, нигаронида шудааст.
«Ҳукумати Тоҷикистон бар ин назар аст, ки бахши хусусӣ дар модели нави рушди кишвар бояд пешсаф бошад ва Бонки ҷаҳонӣ ин назарро пурра дастгирӣ мекунад. Лоиҳаи мазкур ба соҳибкорон баҳри осон кардани ҷараёни ифтитоҳи тиҷорати нав ва сарфаи вақт кӯмак хоҳад расонид», – иброз дошт намояндаи доимии БҶ дар Тоҷикистон Марша Олив.
Дар бонк муътақиданд, ки дар натиҷаи амалисозии лоиҳа ва ба туфайли ҷорисозии «равзанаи ягона», ки мустақиман дастрас хоҳад буд, соҳибкорони Тоҷикистон бо осонӣ тиҷорати худро ба қайд гузошта, дар фурсати наздиктарин барои сохтмон, дастрасӣ ба хизматгузориҳои молиявӣ ва ғайра ноил хоҳанд шуд.
Дар бахши саноати кӯҳкорӣ лоиҳа ба бунёди заминаи бештар мусоиди ҳуқуқӣ ва меъёрӣ ҷиҳати ҳавасмандкунии сармоягузориҳои нав, фароҳам сохтани ҷойҳои корӣ ва пешниҳоди имконоти нав барои аҳолии маҳаллӣ равона гардидааст.
Имрӯз сандуқи сармоягузории Бонки ҷаҳонӣ дар Тоҷикистон аз 14 лоиҳа иборат буда, маблағи умумии онҳо 225 млн. доллари ИМА-ро ташкил медиҳад. Аз ин маблағ сармоягузорӣ бештар ба бахши энергетикаву таъминоти об (35%), сипас бахши кишоварзӣ ва рушди деҳот (31%), рушди маорифу тандурустӣ ва ҳифзи иҷтимоӣ (30%) ва рушди иқтисоду бахши давлатӣ (4%) сурат гирифтааст.
