Шоми рӯзи панҷшанбе муовини аввали нахуствазири Русия Игор Шувалов ба Душанбе ташриф овард.
Тавре ба ОИ «Азия-Плюс» як манбаъ аз ҳукумати ҷумҳурӣ иттилоъ дод, дар фурудгоҳи байнулмилалии Душанбе ҳайати Русияро, ки ба он сардори Хадамоти федералии муҳоҷирати Русия Константин Ромодановский низ шомил аст, муовини аввали нахуствазири Тоҷикистон Матлубхон Давлатов истиқбол гирифт.
Нимаи дуюми имрӯз мулоқоти И.Шувалов бо президенти Тоҷикистон Эмомалӣ Раҳмон баргузор мегардад, ки дар ҷараёни он баррасии маҷмӯи васеи масоили ҳамкориҳои дуҷониба дар назар аст.
Дар ҳамин ҳол, коршиносон бар ин назаранд, ки Игор Шувалов дар ҳукумати кунунии Русия ба масоили молиявӣ масъул буда, сафари дурӯзаи ӯ ба Тоҷикистон маънои онро дорад, ки шартномаи нави ҳузури пойгоҳи низомии Русия дар Тоҷикистон ба наздикӣ ба имзо мерасад.
Ёдрас мекунем, ки нимаи моҳи августи соли равон дар арафаи имзои шартномаи ҳузури минбаъдаи низомиёни Русия дар Қирғизистон маҳз Шувалов ба ин кишвар сафар карда, дирӯз зимни сафари президенти Русия ба Қирғизистон шартномаи мазкур ба имзо расид.
Он замон васоити ахбори умуми Русия иттилоъ дода буданд, ки ба Игор Шувалов муяссар гардид, тамоми масоили муносибатҳои дуҷониба бо кишвари ҳамсояро, ки тайи солҳои ахир нисбати онҳо ихтилофҳо ҷой доштанд, муваффақона ҳал намояд.
Ҳамчунин худи Шувалов низ дар Бишкек изҳор карда буд, ки президенти Русия ӯро вазифадор намудааст, ки «бидуни қарордодҳои мувофиқашуда барнагардад».
