Вазири корҳои хориҷии Ҷумҳурии Тоҷикистон Ҳамрохон Зарифӣ нусхаи Эътимодномаи cафири навтаъини Иёлоти Муттаҳидаи Америка дар Тоҷикистон хонум Сюзан Эллиотро қабул намуд.
Тавре аз Вазорати корҳои хориҷии ҷумҳурӣ иттилоъ доданд, зимни сӯҳбат ҷонибҳо оид ба ҳамкориҳои дуҷониба табодули афкор намуда, ҳавасмандии ҳар ду кишварро ба тавсеаи минбаъдаи равобити мутақобилан судманд изҳор доштанд.
Ёдрас мекунем, ки Сюзан Эллиот санаи 11-уми апрели соли равон сафири ИМА дар Тоҷикистон таъин шуд. Қабл аз ӯ аз соли 2009 Кеннет Гросс ба ҳайси сафири ИМА дар Тоҷикистон фаъолият дошт. Сюзан Эллиот қаблан дар вазифаи муовини ёвари котиби давлатии ИМА дар кишварҳои минтақаи Осиёи Марказӣ ва Ҷанубӣ дар Вазорати корҳои хориҷии ИМА кор кардааст.
