Намояндагии Хадамоти муҳоҷирати назди ҳукумати ҶТ дар Русия ба муҳоҷирони корӣ дар дарёфти маблағи пулии корашон кӯмак расонид.
Бино ба маълумоти намояндагии мазкур, моҳи октябри соли равон кормандони намояндагӣ дар пардохти қарзи 120 нафар коргарони совхози ҶСК «Кузмичи»-и вилояти Волгоград, ки аксарашонро шаҳрвандони Тоҷикистон ташкил мекарданд, ёрӣ расонидаанд.
Бо ҷалби ҳимоягарони соҳибтаҷриба даъвои судӣ барои пардохти қарз аз музди меҳнати ҶСК «Кузмичи» дар назди коргарон ба маблағи 7302000 (ҳафт миллиону сесаду ду ҳазор) рубл қонеъ гардида, айни замон ба коргарон музди меҳнат пардохта мешавад.
Ба иттилои манбаъ, бо мусоидати намояндагӣ ҳамчунин 15 нафар муҳоҷирони кории тоҷик дар корхонаҳои сохмонии шаҳри Екатеринбург бо ҷойҳои корӣ таъмин гардидаанд. «Дар ин корхонаҳо барои муҳоҷирон шароити хуби зист фароҳам оварда шуда, муздли миёнаи меҳнаташон аз 20 то 30 ҳазор рублро ташкил медиҳад», – гуфт манбаъ.
