Дар Китобхонаи миллии Тоҷикистон бо иштироки сафири Чин дар Тоҷикистон Фан Сянжун, вазири фарҳанг Мирзошоҳрух Асрорӣ ва муовини взири корҳои хориҷии ҷумҳурӣ Низомиддин Зоҳидов маросими ифтитоҳи толори махсуси Чин дар китобхонаи мазкур доир гардид.
Тавре ба ОИ «Азия-Плюс» котиби матбуотии Китобхонаи миллии ҷумҳурӣ Фотима Ёқубов хабар дод, ҳукумати Чин толори мазкурро бо 10 ҳазор нусха китобҳои илмиву бадеӣ бо забонҳои чиниву русӣ ва англисӣ, маводи аудио ва видеоӣ оид ба бахшҳои гуногун ва ҳамчунин 10 адад компютер таъмин кардааст.
«Ҳадаф аз иқдоми мазкур таҳкими муносибатҳои дуҷониба миёни Тоҷикистону Чин буда, зимни боздид аз толор дар бораи таъриху сиёсат, фарҳангу иқтисод ва дигар соҳаҳои ҳаёти Чин маълумоти муфассал метавон дарёфт намуд», – гуфт вай.
Ба қавли ӯ, айни замон дар Китобхонаи миллӣ ҳамчунин толорҳои махсуси ИМА ва Олмон низ амал карда, рӯзҳои наздик ифтитоҳи толори Арабистони Саудӣ дар назар аст.
