Зимни конфронси матбуотии рӯзи 28-уми март роҳбари Дастгоҳи кории Дафтари Интерпол (Созмони байнулмилалии пулиси ҷиноӣ) дар Украина Василий Неволя изҳор кард, ки собиқ нахуствазири Тоҷикистон Абдумалик Абдуллоҷонв бо асосҳои қонунӣ боздошт шудааст.
Бино ба навиштаи хабаргузории UNN, Неволя зикр кардааст, ки нисбати Абдуллоҷонов мақомоти ҳифзи ҳуқуқи Тоҷикистон корти баҳисобгирӣ бо гӯшаи сурхро гузоштаанд, ки маънои «бо мақсади истирдод»-ро дорад.
Номбурда илова намудааст, ки айни замон нисбати собиқ нахуствазири Тоҷикистон масоили ҳуқуқӣ мавриди ҳаллу фасл қарор доранд ва дар ҳамин ҳол, таъкид доштааст, ки «чӣ гуна қарор қабул шудан ҳоло номаълум аст».
Собиқ нахуствазири Тоҷикистон рӯзи 5-уми феврали соли равон дар фурудгоҳи байнулмилалии «Бориспол»-и шаҳри Киев бо дархости ҳукуматдорони Тоҷикистон боздошт шуд. Рӯзи 7-уми феврал суд оид ба ҳабси муваққатии Абдуллоҷонов ба муҳлати 40 рӯз қарор қабул кард, ки дар ин муддат ҳукуматдорони Тоҷикистон мебоист ҳуҷҷатҳои зарурӣ ҷиҳати асоснок будани истирдоди ӯ ба Тоҷикистонро пешниҳод мекарданд.
Даҳаи дуюми моҳи марти соли ҷорӣ суди ноҳияи Шевченкои шаҳри Киев нисбати собиқ нахуствазири Тоҷикистон Абдумалик Абдуллоҷонов
чораи ҳабси истирдодиро
мавриди амал қарор дод.
Ҳамин тариқ суд дархости прокуратура дар бораи қабули қарор оид ба ҳабси истирдодии Абдуллоҷонов бинобар сабаби то ба аҳол ба итмом нарасидани санҷиши истирдоди ӯро қонеъ сохт. «То ҳалли масъалаи истирдоди ӯ ҳабси истирдодии Абдуллоҷонов муқаррар карда шавад, вале на зиёдтар аз 12 моҳ», – гуфта шудааст дар таъиноти суд.
