Имрӯз дар Кохи Сомони бӯстонсарои шаҳрии ҳукумати Тоҷикистон ҷаласаи 11-уми вазирони корҳои хориҷии кишварҳои иштирокдори Муколамаи ҳамкории Осиё оғоз гардид. Барои иштирок дар ин ҳамоиш вазирони корҳои хориҷӣ ва ё дигар намояндагони воломақом аз 32 кишвари иштирокдори ин созмон ва ҳам вакилони созмонҳои зиёди минтақавию байналмилалӣ ба ҳам омаданд.
Дар оғози ҷаласа, ки бо сухани ифтитоҳӣ ва таҳти раёсати вазири корҳои хориҷии Тоҷикистон Ҳамрохон Зарифӣ ҷараён гирифт, президенти Тоҷикистон Эмомалӣ Раҳмон иштирок ва суханронӣ намуд.
Сарвари давлати Тоҷикистон аз ҷумла изҳор намуд, ки дар қитъаи Осиё зиёданд кишварҳое, ки дастрасии кофӣ ба неъматҳои маъмулии иқтисодию иҷтимоӣ, аз ҷумла маҳсулоти ғизоӣ, нерӯи барқ, оби тоза, хизматрасонии тиббӣ ва маориф надоранд. «Мушкилоти зикршуда аҳамияти вусъат додани фаъолияти Муколамаро дар марҳилаи кунунӣ боз ҳам болотар мебарад», – гуфт ӯ.
Бо назардошти камбуди нерӯи барқ дар аксари кишварҳои минтақа Эмомалӣ Раҳмон ба таҳкими ҳамкориҳо дар бахши энергетика таваҷҷуҳи хосса зоҳир кард. «Ба андешаи мо, гидроэнергетика ба ҳайси яке аз унсурҳои муассир дар ин самт, метавонад ба барномаи афзалиятноки рушди устувор табдил ёбад. Захираҳои бои обӣ ба мо имкони нодиреро барои рушди ин бахш фароҳам овардаанд. Татбиқи чунин барнома метавонад аҳолии кишварҳои минтақаро ба нерӯи барқи арзон, таҷдидшаванда ва аз ҷиҳати экологӣ тоза таъмин намояд», – таъкид кард Эмомалӣ Раҳмон.
Президенти Тоҷикистон зикр кард, ки аз замони таъсис ёфтани Муколамаи ҳамкории Осиё беш аз даҳ сол сипарӣ шуд ва дигаргуниҳои зиёде, ки дар ин давра дар сиёсати ҷаҳонӣ ба вуқӯъ пайвастанд, дурустии ташкили Муколама ва зарурати такмил ва тавсеа бахшидани мазмуну мундариҷаи фаъолияти онро собит сохтанд.
Эмомалӣ Раҳмон бар ин назар аст, ки Муколама бояд стратегияи рушди устувори кишварҳои иштирокдорро тарҳрезӣ намояд ва барои баррасии масъалаҳои таҳкими фаъолияташ гурӯҳҳои кории соҳавӣ таъсис диҳад. «Гузашта аз ин, таъсис додани гуруҳҳои коршиносони кишварҳои иштирокдори Муколама ҷиҳати муайян кардани тадбирҳои муштарак оид ба масъалаҳои таъмини амнияти озуқаворӣ, рушди энергетика ва инфрасохтор дар минтақаи Осиё имконияту пешомадҳои зиёдро дар ин самтҳо ошкор карда метавонад», – зикр кард ӯ.
Ғайр аз ин президенти Тоҷикистон таъсис додани Фонди молиявии муколамаро пешниҳод намуд. «Фикр мекунам, ки бо таъсис додани фонди молиявии худ Муколама метавонад маблағҳои кишварҳои алоқамандро ҷалб ва мутамарказ намуда, онҳоро ҳадафмандона барои дастгирии кишварҳои ниёзманд, хусусан ҷиҳати паст намудани сатҳи камбизоатӣ равона созад», – афзуд сарвари давлати Тоҷикистон.
