Айни замон нақшаи даъвати баҳорӣ ба хизмати ҳарбӣ дар даҳ шаҳру навоҳӣ пурра ба иҷро расида, дар маҷмӯъ 64%-и нақшаи пешбинишударо ташкил медиҳад.
Тавре ба ОИ «Азия-Плюс» сардори маркази матбуоти Вазорати мудофиаи ҶТ подполковник Фаридун Маҳмадалиев хабар дод, нақшаи даъвати баҳорӣ ба хизмати ҳатмии ҳарбӣ дар сафи Қувваҳои Мусаллаҳи ҶТ дар шаҳри Қайроққум ва ноҳияи Шаҳристони вилояти Суғд, ноҳияҳои Носири Хусрав, Қубодиён, Ховалинг ва Темурмалики вилояти Хатлон, ноҳияҳои Мурғоб ва Ванҷи ВМКБ ва ноҳияҳои Ҷиргатолу Рашти навоҳии тобеи марказ пурра ба иҷро расидааст.
Ба қавли вай, айни замон нақшаи даъват дар вилояти Хатлон ба андозаи 71%, вилояти Суғд – 56%, ВМКБ – 72%, ноҳияҳои тобеи марказ – 66% ва шаҳри Душанбе – 62% ба иҷро расидааст.
Маъракаи даъвати баҳорӣ ба хизмати ҳатмии ҳарбӣ дар сафи Қувваҳои Мусаллаҳи Тоҷикистон 1-уми апрел оғоз ёфта, то 31-уми майи соли равон идома меёбад. Тибқи қонун, ба хизмат шаҳрвандони синнусоли аз 18 то 27-сола, ки барои мавқуф гузоштани хизмат ё озод шудан аз он ҳуқуқ надоранд, даъват карда мешаванд.
Қобили зикр аст, ки ҳамасола ба хизмат дар сафи Қувваҳои Мусаллаҳи кишвар тақрибан 15-16 ҳазор нафар даъват карда мешаванд. Дар Тоҷикистон зиёда аз 600 ҳазор нафар ҷавонони синнусоли мувофиқ ба хизмати ҳарбӣ ба сар мебаранд, аммо ҳудуди 150 ҳазор нафари онҳо мӯҳлати хизматашонро мавқуф гузоштаанд ё аз хизмат озод карда шудаанд ва ё барои хизмати ҳарбӣ коршоям нестанд. Боз ҳудуди 100 ҳазор нафар шаҳрвандони синнусоли мувофиқ ба хизмати ҳарбии Тоҷикистон дар муҳоҷират қарор доранд.
Қувваҳои Мусаллаҳи Тоҷикистон аз се навъи ҷузъу том – нерӯҳои низомии зудамал, хушкигард, дифоъи зиддиҳавоӣ ва нерӯҳои низомии ҳавоӣ иборат аст.
