Президенти кишвар Эмомалӣ Раҳмон мири шаҳри Сямени Ҷумҳурии мардумии Чин Лю Кэтсинро ба ҳузур пазируфт.
Бино ба иттилои хадамоти матбуоти сарвари давлат, дар мулоқот масоили ташкил ва густариши ҳамкории Тоҷикистону шаҳри Сямени Ҷумҳурии Мардумии Чин, аз ҷумла дар доираи бародаршаҳрии Душанбею Сямен баррасӣ шуд.
Эмомалӣ Раҳмон аз таассуроти накӯ ва натиҷаҳои боздиди худ аз ин шаҳр, ки моҳи июни соли 2012 сурат гирифта буд, ёдовар шуда, изҳори боварӣ намуд, ки робитаҳои ду ҷониб судбахш хоҳанд буд. Таъкид гардид, ки муносиботи ба сатҳи стратегӣ расидаи Тоҷикистону Чин барои густариши ҳамкории гуногунҷанба заминаи мусоид эҷод намудааст.
Лю Кэтсин иттилоъ дод, ки барои барпо намудани робитаҳои мустақими созанда ӯро дар ин сафар, ҳамчунин як гурӯҳ соҳибкорони бонуфузи шаҳри Сямен ҳамроҳӣ мекунанд.
Зимни суҳбати самимӣ доир ба роҳҳои гуногуни ташкил ва густариши ҳамкорӣ, иштирок дар татбиқи лоиҳаҳои омодаи сармоягузорӣ дар Тоҷикистон ва дигар мавзӯъҳои мавриди таваҷҷуҳ гуфтугӯй сурат гирифт.
