Рӯзи якшанбеи гузашта дар ноҳия Файзобод куштори посбони филиали яке аз бонкҳои калонтарини кишвар ба амал омад.
Чӣ тавре ки ба Хабаргузории «Азия-Плюс» сардори маркази матбуоти Вазорати корҳои дохилии ҶТ Маҳмадулло Асадуллоев иттилоъ дод, 7-уми июли соли равон, тахминан соати 18:05 дақиқа шахсони номаълум вориди бинои филиали «Агроинвестбонк», воқеъ дар кӯчаи Исмоили Сомонии ноҳияи Файзобод шуда, посбон – милитсионери шӯъбачаи Хадамоти давлатии «Муҳофиза»-и Шӯъбаи ВКД дар ин ноҳия, сержанти калони милитсия Шерализода Раҳмонхӯҷаро, ки адои хизмат мекард, бо яроқи оташфишони хизматиаш тамғаи АКС ба ҳалокат расонидаанд. Шахсони номаълум бо олоти бурандаи номаълум дари сандуқи оҳанини (сейф) хазинаро кӯшиши буридан карданд, аммо онро кушода натавониста, яроқи оташфишони мазкурро гирифта, аз ҷойи ҳодиса ғайб задаанд.
Оид ба ҷинояти мазкур мутобиқи моддаҳои 104 қисми 2, банди «и» (Одамкушӣ) ва 249 қисми 4 банди «в» (Роҳзанӣ) КҶ ҶТ парвандаи ҷиноятӣ оғоз гардидааст.
Бо фармони вазири корҳои дохилӣ Рамазон Раҳимов гурӯҳи тафтишотӣ-оперативӣ таъсис дода шуда, муовини вазир роҳбари гурӯҳ мебошад. Сардорони раёсатҳои дахлдори ВКД барои кушодани ин ҷиноят сафарбар шуда, тафтиши ҳодисаи мазкур зери назорати вазири корҳои дохилӣ қарор дорад.
