– Андешаи ман дар бораи ба хотири ҳифзу нигаҳдории генофонди миллати тоҷик ба хориҷиён ба шавҳар набаромадани тоҷикзанону духтарон, дар аксари васоити ахбори умуми ватаниву хориҷӣ ҳамчун ташаббуси қонунгузории вакили палатаи поёнии парлумон маънидод шудааст, ки ман ба ин қатъиян розӣ нестам, – ибрози назар кард дар мусоҳиба ба хабарнигори ОИ «Азия-Плюс» вакили МНМО ҶТ Саодат Амиршоева.
Номбурда таъкид намуд, ки ҳамчун ҳуқуқшиноси касбӣ бахубӣ огоҳ аст, ки дар давлат ва ҷомеаи мутараққиву демократӣ аз рӯи қонунгузорӣ манъ кардани чунин никоҳҳо қотеъона ғайриимкон мебошад.
«Панду насиҳати ман бобати ба мардони дигар мазҳаб, намояндагони миллатҳои гуногун – русҳову чиниҳо ва дигарон ақди никоҳ набастани занону духтарони тоҷик аз ин лиҳоз аст, ки ба кӯдакони аз ин никоҳҳо тавлидшуда расму русум ва оинҳои милли мо бегона хоҳанд буд», – иброз дошт вакил.
Дар ҳамин ҳол, ӯ бар ин назар аст, ки ин гуна панду насиҳатҳои ӯ набояд миллатгароӣ унвон шаванд. «Ман ба намояндагони тамоми миллатҳо эҳтиром қоилам, вале хоҳони онам, ки кӯдакону наберагони ман идомадиҳандаи фарҳангу забон ва дину оини ҷадди худ бошанд ва барои ин маро ба миллатгароӣ айбдор намудан, ҳадди ақал бемаънӣ аст», – таъкид дошт Амиршоева.
Вакил ҳамчунин аз он изҳори тааҷҷуб намуд, ки то ҳанӯз рӯҳониёни сершумори тоҷик мавқеи худ дар масъалаи ба намояндагони мазҳаби дигар ба шавҳар баромадани занону духтарони тоҷикро муайян накардаанд.
