Ҳуқуқшинос, директори созмони ҷамъиятии «Маркази мустақили ҳуқуқи инсон» Сергей Романов мегӯяд, тафтишот бояд чӣ гуна ва аз куҷо дастрас шудани ҳуҷчати ронандагии ноболиғ Расули Амонуллоро, ки бо гуноҳи ӯ дар садамаи нақлиёт се нафар ҷон бохтанд, ошкор намояд.
Ӯ хотиррасон намуд, ки дар қонунгузории Тоҷикистон рондани автомашина ба ноболиғе, ки ҳуҷҷати иҷозати ронандагӣ надорад, манъ буда, танҳо аз синни 18-солагӣ дастрасӣ ба он имконпазир мегардад.
«Агар ӯ чунин ҳуҷчат дошта бошад, пас бо кадом асосу аз куҷо ва чӣ гуна дастрас кардани онро мебояд ошкор намуд, ки ин салоҳияти тафтишот аст», – гуфт ҳуқуқшинос.
Ғайр аз ин, Романов аз эҳтимол дур намедонад, ки дар ин қазияи пурсарусадо шояд муқаррароти қонун «Дар бораи масъулияти падару модар дар таълиму тарбияи фарзанд» низ мавриди амал қарор гирад.
«Волидайн ба рондани автомашина набояд ба ӯ иҷозат медоданд, аз ин рӯ, нисбати падару модари Р.Амонулло низ бояд чораҳои дахлдор андешида шаванд», – иброз дошт Романов.
Дар ҳамин ҳол, имрӯз аз рӯи далели ин садамаи фоҷеабор мутобиқи моддаи 212, қ. 3 КҶ ҶТ (Вайрон кардани қоидаҳои ҳаракати роҳ ва истифодаи воситаҳои нақлиёт, ки аз беэҳтиётӣ боиси марги ду ё бештар шахсон гаштааст) парвандаи ҷиноӣ боз гардида, дар он ҳукми аз 5 то 10 соли маҳрумият аз озодӣ пешбинӣ мешавад.
Ёдрас мекунем, ки бар асари
садамаи нақлиёти фоҷеабор
, ки шоми рӯзи 9-уми октябр дар хиёбони Рӯдакии пойтахт рух дод, се нафар ба ҳалокат расида, боз се тан бо ҷароҳатҳои вазнини ҷисмонӣ ба бемористон мунтақил шуда буданд.
Пас аз баргузор намудани амалиёти тафтишотӣ аз ҷониби кормандони милиса бо мақсади муайян кардани гунаҳкорони садамаи фоҷебаор, ки шоми рӯзи 9-уми октябр дар хиёбони Рӯдакии пойтахт рух дод, ошкор шудааст, ки
гунаҳкори ин садама Расул Амонуллои
16-сола будааст.
Аввали ҳамин ҳафта яке аз хешони ҷабрдида Маталиев ба ОИ «Азия-Плюс» изҳор намуд, ки «муддати панҷ рӯз баъди садама ҳеҷ касе аз намояндагони аҳли оилаи Ҳукумовҳо
ба аёдати ҷабрдидагон
ба Маркази миллии тиббӣ наомадаанд, ки ҳадди ақал онҳоро аз ҷиҳати маънавӣ дастгирӣ кунанд».
