Додгоҳи ноҳияи Исмоил сомонӣ пас аз баррасии ниҳоии парвандаи марги сокини 28-солаи пойтахт Баҳромиддин Шодиев, ки пас аз пурсиш дар Шуъбаи ВКД –и ноҳияи Шоҳмансур ба ҳалокат расида буд, Вазорати корҳои дохиларо ба супоридани 14 ҳазор сомонӣ ҷубронӣ моддӣ ва маънавӣ ба модари фавтида муваззаф кард.
Судя Ҳотамҷон Раҷабов 18-уми ноябр таъкид дошт, ки қарор оид ба ҷуброни маънавӣ тибқи модаҳои 198 ва 203-и Кодекси мурофиаи гражданӣ қабул карда шудавст. Дар робита ба ин, Вазорати корҳои дохила бояд 8 ҳазору 579 сомонию 30 дирам ба модари Баҳромиддин Шодиев барои ҷуброни зарари моддӣ ва 6 ҳазор сомонӣ зарарӣ маънавӣ супорад. Инчунин, ба гуфтаи судя, аз Вазорати корҳои дохила ба фоидаи давлат 61 сомонӣ боҷи давлатӣ руёнида мешавад.
Аммо модари фавтида Ниёзбӣ Бӯриева, ки пулҳои руёнидашударо барои ба воя расонидани наберааш нияти сарф кардан дошт, мегӯяд, ки аз ҳалномаи суд розӣ нест.
Баҳромиддин Шодиев рӯзи 19-уми октябри соли равон дар шаҳри Душанбе боздошт гардид. Гумонбаршуда баъди аз шӯъбаи корҳои дохилии ноҳияи Шоҳмансури пойтахт ба шӯъбаи эҳёгарии Маркази миллии тиббӣ мунтақил шудан ба ҳалокат расид. Мутобиқи фарзияи кормандони милиса, Шодиев пас аз боздошт аз ошёнаи дуюми бинои ШКД худро ба поин афканда, ба ҳалокат расидааст.
Тибқи фарзияи дигар, ки аз ҷониби хешовандони фавтида садо дод, Шодиев дар шӯъбаи милиса мавриди латукӯби бераҳмона қарор гирифта, бо ҷароҳатҳои вазнини ҷисмонӣ ба шӯъбаи эҳёгарии бемористон мунтақил ва пас аз 10 рӯз фавтидааст.
Пас аз ин ҳодиса дар Вазорати корҳои дохилӣ тафтишоти дохилӣ доир гардида, барои риоя накардани тартиботи бозпурсӣ кормандони фаврӣ – майори милиса Диловар Муродов, капитани милиса Алишер Иноятов ва муфаттиши масъули тафтиши ҳодисаҳои дуздӣ лейтенанти милиса Абдураҳмон Додов аз мансаб сабукдӯш гардиданд.
Ғайр аз ин, муовини сардори ШКД-и ноҳияи Шоҳмансур, подполковники милиса Илҳомҷон Каримов низ аз вазифа озод гардид.
Бо фармони вазири корҳои дохилии ҷумҳурӣ, ба сардори шӯъбаи корҳои дохилии ноҳияи Шоҳмансур полковники милиса Сафармад Одинаев, сардори шӯъбаи тафтишот майори милиса Абдуқодир Назаров ва муовини ӯ Баҳодур Содиқов огоҳии қатъӣ эълон гардид.
Ҳодисаи мазкур миёни аҳли ҷомеа сарусадоҳои зиёде ба бор овард. Эътилофи Ташкилоти ғайриҳукуматӣ (ТҒҲ)-и мубориза алайҳи шиканҷа дар Тоҷикистон аз ҳукуматдорон даъват ба амал овард, ки тафтишоти фаврӣ ва дақиқи қазияи марги сокини 28-солаи шаҳри Душанбе Баҳромиддин Шодиевро баргузор намоянд.
