– Ҷузъу томҳои Вазорати муофиаи Тоҷикистон айни замон дар маҳалли доими таъинот мустақар буда, маълумоти чанде аз расонаҳои русу қирғиз дар бораи ба самти марз бо Қирғизистон равона шудани онҳо асоси воқеӣ надоранд, – изҳор дошт дар мусоҳиба ба ОИ «Азия-Плюс» сардори маркази матбуоти Вазорати мудофиаи ҶТ Фаридун Маҳмадалиев.
Ӯ чунин маълумотро иғвоангез унвон карда, илова анамуд, ки «касе хоҳиш дорад, ки чизи набударо чун воқеияти дилхоҳаш инъикос кунад».
«Маълумоти расонаҳои қирғиз дар бораи сафарбарии умумӣ эълон шудан дар манотиқи марзии Тоҷикистон ягон асоси воқеӣ надошта, умуман саволе ба миён меояд, ки журналист ба кадом хотир чунин хабарҳоро мунташир месозад?», – мегӯяд Маҳмадалиев.
Дар ҳамин ҳол, хабаргузории КирТаг бо истинод ба як сарчашмаи худ дар сохторҳои қудратии Қирғизистон имрӯз хабар дод, ки «Тоҷикистон дар марз бо Қирғизистон техникаи зиреҳпӯш овардааст».
«Гуфтушуниди ҷонибҳо ҷараён доранд, вале аз онҳо то ҳанӯз ҳеҷ натиҷае ҳосил нашудааст. Аз рӯзи оғози муноқиша ҷонибҳо посбонии марзро пурзӯр мекунанд. Тоҷикистон ба марз технкаи зиреҳпӯш оварда, аз ҷониби мо бошад, он ҷо танҳо сарбозон қарор доранд», – менависад ин хабаргузорӣ.
