Вазоратҳои корҳои дохилии Тоҷикистону Қирғизистон дар марзи давлатии ҳарду кишвар хатсайрҳои муштараки посбонӣ таъсис доданд. Дар ин бора ба ОИ «Азия-Плюс» аз Раёсати ВКД ҶТ дар вилояти Суғд хабар доданд.
«Дар қаламрави деҳоти наздимарзӣ 8 хатсайри муштараки посбонии кормандони милисаи Тоҷикистону Қирғизистон ташкил карда шуданд», – гуфтанд дар Раёсат.
Ба иттилои манбаъ, ин иқдом ба таъмини тартиботи ҷамъиятӣ, амнияти шаҳрвандон ва равуои бемамониати воситаҳои нақлиёту сокинони ин деҳот ва пешгирии муноқишаҳо дар марз мусоидат мекунад.
«Кормандони масъули мақомоти милисаи ҳарду кишвар ҳамарӯза аз соати 9-и субҳ то 22-и шаб дар 3 хатсайри автомобилӣ ва 5 хатсайри пиёдагарди муайяншуда муштаракан посбонӣ мекунанд», – гуфт манбаъ.
Зимнан зикр гардид, ки чунин хатсайрҳои муштараки посбонии марз муқаррар шудаанд:
№1. «Хатсайри автомобилии «Чоркуҳ – Оқсой». Минтақаи посбонӣ – қаламрави деҳоти Уртабуз – Хоҷаи Аъло – Оқсой.
№2. «Хатсайри автомобилии Сомониён-Кӯктош». Минтақаи посбонӣ – қаламрави деҳоти Зарафшон – Яккатерак – Первомайск – Кӯктош.
№3. «Хатсайри автомобилии Ворух – Оқсой». Минтақаи посбонӣ – қаламрави деҳоти Ворух – Оқсой.
№4. «Хатсайри пиёдагарди Сомониён – Кӯктош».
№5. «Хатсайри пиёдагарди Уртабуз».
№6. «Хатсайри пиёдагарди Хоҷаи Аъло – Томтумшуқ».
№7. «Хатсайри пиёдгарди Ворух – Оқсой».
№8. «Хатсайри пиёдагарди Зарафшон – Уртабуз».
