Дар ҷараёни амалиёти кормандони мақомоти милисаи ҷумҳурӣ дар минтақаҳои гуногуни кишвар, аз як қатор кӯшишҳои муомилоти ғайриқонунии маводи мухаддир пешгирӣ шуда, дар натиҷа 1 шаҳрванди Афғонистону 3 шаҳрванди Тоҷикистон боздошт ва беш аз 40 кило маводи мухаддир дарёфт ва мусодира карда шуд.
Бино ба иттилои сомонаи расмии ВКД ҶТ, дар ҳудуди ҷамоати деҳоти Даштиҷуми ноҳияи Шӯрообод шаҳрванди Афғонистон Комилхон валади Ҳоҷивакил дастгир карда шудааст, ки аз борхалтаи ӯ 35 кило маводи нашъадори «афюн» ва 4 килою 540 грамм «бангдона» мусодира гардид.
«Ҳангоми азназаргузаронии автомашинаи тамғаи «ВАЗ-21010» мутааалиқ ба сокини ноҳияи Рӯдакӣ Шаҳром Шералии 22-сола 1 килою 140 грамм маводи нашъадори «ҳашиш» дарёфт ва мусодира карда шуд. Дар вақти санҷиши иловагӣ муайян карда шуд, ки маводи мазкур ба шаҳрванд Шӯҳрати,Каримови 24-сола, сокини ноҳияи Ҳисор тааллуқ дорад», – зикр мегардад дар хабари сомона.
Гуфта мешавад, ҳамчунин дар ҳудуди вилояти Суғд сокини шаҳри Хуҷанд Нурулло Сафарови 41-сола бо 303 грамм маводи нашъадори «ҳашиш» дастгир карда шудааст. «Вазни умумии маводҳои мусодирашуда дар тайи ин ду рӯз 40 килою 983 граммро ташкил медиҳад», – омадааст дар иттилоъ.
Зимнан зикр мегардад, ки нисбати далелҳои мазкур парвандаи ҷиноӣ оғоз гардида, тафтиши пешакӣ идома дорад.
