Чанде қабл нахуствазири Тоҷикистон Қоҳир Расулзода бо фаъолияти Маркази барқу гармидиҳӣ (МБГ)-и Душанбе-2 аз наздик шинос шуд.
Тавре ба «Азия-Плюс» сармушовири хадамоти матбуоти президенти ҶТ Субҳиддин Муҳиддинов хабар дод, айни замон барои ба истифода додани навбати дуюми марказ корҳои сохтмонӣ идома доранд.
«Дар паёми президенти ҷумҳурӣ ба парлумон дар ин робита зикр гардид, ки се соли минбаъда иқтидори МБГ Душанбе-2 бояд ба 400 МВт расонида шавад. Навбати аввали марказ бо иқтидори 50 МВт ахири соли гузашта мавриди истифода қарор гирифта, пас аз ба истифода додани навбати дуюми он дар соли ҷорӣ иқтидори иншоот ба 100 МВт мерасад», – гуфт Муҳиддинов.
Ба гуфтаи ӯ, Расулзода ба шахсони масъул ҷиҳати таъмини фаъолияти мунтазами марказ дар давраи тирамоҳу зимистон, саривақт анҷом додани корҳои хобонидани қубурҳои оби гарм ва нуқтаҳои гармидиҳӣ, пайваст намудани МБГ Душанбе-2 бо МБГ Душанбе-1, ба таври кофӣ захира намудани ангишт, таъмиру азнавсозии роҳҳои мошингарди атрофи иншоот ва тақвияти корҳои беҳдоштии ҳифзи муҳити зист дастуру супоришҳо дод.
