Ҳукумати Тоҷикистон тағйироту илова ба қонуни кишвар «Дар бораи коррупсия»-ро омода кардааст. Дар сурати қабули онҳо, хизматчиёни давлатие, ки аз шаҳрвандони ҷумҳурӣ, шаҳрвандони хориҷӣ, созмонҳои байнулмилалӣ, хориҷӣ ва ватанӣ ва намояндагони ҳукумати дигар кишварҳо ҳадяи арзишаш болотар аз 400 сомониро мегиранд, ба супурдани онҳо ба мақомоти дахлдор уҳдадор мешаванд. Дар ин бора ба «Азия-Плюс» як манбаъ аз ҳукумати ҷумҳурӣ хабар дод.
Муовини аввали раиси Ҳизби коммунисти Тоҷикистон, вакили палатаи поёнии парлумон Исмоил Талбаков ба «Азия-Плюс» дар ин робита изҳор намуд, ки тағйироти мазкур ба таҷрибаи байнулмилалӣ дар самти мубориза бо коррупсия созгор буда, талаботи замона аст.
«Маълум аст, ки ҳангоми баимзорасии созишномаҳои ҳукумат бо паймонкорони ватанӣ ё хориҷӣ, ки ба иҷрокунанда фоидаовар аст, ё зимни баргузории тендерҳо аксаран ба мансабдори давлатӣ туҳфаҳои гаронарзиш тақдим мекунанд, ки аслан ришва мебошад», – иброз дошт вакил.
Талбаков гуфт, аксари туҳфаҳое, ки ба сарвари давлати Тоҷикистон зимни сафарҳо ба хориҷи кишвар тақдим карда шудаанд, ба Осорхонаи миллии ҷумҳурӣ супурда шуда, ба маърази тамомшои умум гузошта шудаанд. «Хурсандиовар аст, ки ахиран чанде аз аъзои ҳукумати Тоҷикистон низ ба сарвари давлат пайравӣ карда, туҳфаҳои гаронарзиши ба онҳо тақдимшударо ба фонди Осорхонаи миллӣ месупоранд», – таъкид дошт Талбаков.
