Дар робита ба ҳодисаи ҳамла ба раиси Ҳизби наҳзати исломии Тоҷикистон Муҳиддин Кабирӣ Шӯрои сиёсии ҲНИТ изҳороти расмӣ интишор намуд.
Дар изҳорот зикр мегардад, ки Шӯрои сиёсии ҲНИТ ҳодисаи ҳуҷум ба раиси ҳизб ва вакили Маҷлиси намояндагони кишвар Муҳиддин Кабирӣ ва ҳайати ҳамроҳонаш дар шаҳри Кӯлобро шадидан маҳкум намуда, онро ҷинояти тарҳрезишуда аз ҷониби доираҳое медонад, ки оромию субот ва Ваҳдати миллиро халалдор кардан мехоҳанд. Дар арафаи таҷлил аз рӯзи Ваҳдати миллӣ анҷом гирифтани ин ҷиноят бори дигар гувоҳӣ медиҳад, ки ҳанӯз ҳам доираҳои мафиатҷӯ хоҳони бесуботӣ ва нооромии нав дар кишвар ҳастанд.
«Бояд ёдовар шуд, ки то имрӯз бо ташаббуси роҳбарияти ҳизб ба хотири ҳимоя аз Ваҳдати миллӣ ва оромию субот дар кишвар сиёсати сабру таҳаммулгароӣ дар баробари фишору озори мақомот аз масъулияти аввалиндараҷаи ҳар узви ҳизб ба шумор мерафт. Боиси таассуф аст, ки аз сиёсати сабру таҳаммули ҲНИТ мақомоти давлатӣ сӯистифода намуда, фишору ҳуқуқвайронкунии худро бештар карданд.
Гуфта мешавад, Шӯрои сиёсии ҲНИТ идома ёфтани ин вазъиятро дар остонаи омодагӣ ба чорабинии муҳимми сиёсӣ – интихоботи парлумонӣ барои субот ва амнияти кишвар хатарнок меҳисобад. Ҳукумати Ҷумҳурии Тоҷикистонро зарур аст, ки бо амалӣ намудани чораҳои мушаххас ҳарчи зудтар пеши роҳи амалҳои ғайриқонунӣ ва иғвогароёнаи баъзе мақомот ва гурӯҳҳоро бигирад ва нишон бидиҳад, ки масъулияти таъмини амният, ҳуқуқу озодиҳои ҳамаи шаҳрвандон ва ҳизбҳои сиёсиро новобаста аз нажод, дин, ҳизбият ва минтақа ба дӯш дорад.
