Дар фароварди сафари давлатӣ ба Малайзия Президенти Ҷумҳурии Тоҷикистон Эмомалӣ Раҳмон аз корхонаи мошинсозии Протон боздид намуда, бо фаъолияти он бевосита шинос шуд.
Бино ба иттилои хадамоти матбуоти сарвари давлат, корхонаи мошинсозии Протон дар ҳамкорӣ бо брендҳои ҷаҳонии Лотуси Инглистон ва Митсубисии Япония солҳои 80-уми асри гузашта ба кор шуруъ намуда, дар дохил ва хориҷи кишвар бозори фурӯши маҳсулоти худро пайдо намудааст.
Ба иттилои манбаъ, дар ин корхона ҳамасола беш аз 300 ҳазор мошинҳои гуногуни сабукрав истеҳсол мешавад.
Гуфта мешавад, зимни боздид ҳамчунин доир ба ташкили ҳамкории ин корхона бо Тоҷикистон гуфтугӯйи судманд сурат гирифт.
