Дар зарфи 6 моҳи соли равон дар минтақаи Кӯлоби вилояти Хатлон шумори гирифторони бемории Вируси норасоии масунияти одам (ВНМО, ВИЧ)/Бемории пазируфтаи норасоии масуният (БПНМ, СПИД) 61 нафар зиёд шудааст, ки нисбат ба нишондиҳандаи ҳамин давраи соли гузашта 10% камтар мебошад.
Мудири Маркази вилоятии мубориза ва пешгириии бемории ВНМО/БПНМ дар минтақаи Кӯлоб Тоҳир Туманов ба «Азия-Плюс» дар ин робита иттилоъ дод, ки ҳамин тариқ шумори умумии мубталоёни гирифторӣ ба ин беморӣ дар минтақа аз оғози нахустин сабти ҳолати гирифторӣ дар соли 2003 ба 809 нафар расидааст.
«Аз беморони тозасабтшуда 33 нафарашон сокинони шаҳру ноҳияи Кӯлоб ва боқимонда аз тамоми ноҳияҳои минтақа, аз ҷумла 8 нафарӣ аз ноҳияҳои Восеъ ва Фархор мебошанд», – иброз дошт вай.
Ба қавли ӯ, феълан миёни занони синнусоли қобили таваллуд (репродуктивӣ) шумори гирифторон ба ин беморӣ меафзояд, ки ин вазъ хеле нигаронкунанда аст. «Аз 61 нафари сироятёфта дар соли гузашта 28 нафарашон занон буданд, ки чунин таносуб қаблан ба мушоҳида намерасид», – изҳор дошт Туманов.
Номбурда ҳамчунин тамоили дигари ташвишовар дар ин самтро зикр карда, иттилоъ дод, ки маъмулан дар ин самт истеъмолгарони маводи нашъаовар тариқи сӯзандору бештар буданд, вале акнун шумори гирифторон тавассути алоқаи ҷинсӣ низ дар ҳоли афзоиш аст, ки аз миқдори умумӣ 44,2%-ро ташкил медиҳанд.
Бино ба маълумоти Туманов, айни замон 201 нафар мубталоёни ин беморӣ мавриди муолиҷа қарор дошта, тайи 10 соли бақайдгирии ин беморӣ дар минтақа 254 нафар сироятёфта ба ҳалокат расидаанд.
