Нархи бензини аз ҳама серхаридору писандидаи навъи АИ-92 имрӯз дар Кӯлоб аз 5,3 сомонии қаблӣ то ба 5,8 сомонӣ барои 1 литр боло рафт.
Коршиносони маҳаллӣ ба «Азия-Плюс» дар мавриди ин масъала иброз намуданд, ки тамоили болоравии нархи бензин муддати якуним моҳи ахир тадриҷан идома дорад.
Ба гуфтаи онҳо, қабл аз моҳи Рамазон арзиши 1 литр бензини навъи АИ-92 ба 4,6 сомонӣ баробар буд.
Дар ҳамин ҳол, дар 5 нуқтаи фурӯши маводи сӯзишвории шаҳр ба хабарнигори «Азия-Плюс» кормандон ин вазъро чунин шарҳ доданд, ки сӯзишворӣ бо нархи баланд ба шаҳр ворид мешавад ва дафтари кории асосии ширкатҳои онҳо дар пойтахт фаъолият доранд.
Қобили зикр аст, ки ронандагони автомашинаҳои машғул ба мусофиркашонӣ фавран аз ин вазъ истифода бурда, арзиши роҳкиро барои як нафарро аз 1 сомонӣ то ба 2 сомонӣ боло бурданд.
