Рӯзи 9-уми сентябр дар Китобхонаи миллии Тоҷикистон маросими муаррифии мусаввараи «Боғи дӯстӣ» ба муносибати сафари нахустини давлатии Раиси Ҷумҳурии Мардумии Чин Си Ҷинпин ба Тоҷикистон баргузор шуд. Муаллифи мусаввара рассом Фаридун Зода асарашро ба Китобхонаи миллии кишвар ҳадя намуд.
Мусаввараи «Боғи дӯстӣ» муддати қариб ним сол офарида шуда, дӯстии чандинсараи мардуми Тоҷикистону Чинро таҷассум менамояд.
Қобили зикр аст, ки баҳори соли 2006 дар наздикии шаҳри Пекин ба бунёди боғи зардолу аз 125 дарахти навъҳои «Мирсанҷалӣ» ва «Бобоӣ» асос гузошта шуд. Аз ҳамон замон дар мавсими ба гулкунӣ даромадани дарахтон дар фасли баҳор ҳамасола ҷашнвора гузаронида мешавад, ки дар муддати кӯтоҳе ба ҷашнвораи байнулмилалӣ табдил ёфт. Тобистон меҳмонон дар ҷамъоварии ҳосил дарахтони боғ иштирок мекунанд.
Фаридун Зода соли 1958 дар шаҳри Душанбе ба дунё омада, мактаби махсуси назди академияи ба номи Суриков ва сипас худи академияро хатм намудааст. Айни замон ӯ дар шаҳри Линколн, иёлати Небраскаи ИМА иқомат дорад. Дорандаи ҷоизаҳои якчанд озмунҳои байнулмилалии рассомони касбӣ аст. Асарҳои рассом дар осорхонаҳои зиёди Русия, Чин, ИМА ва Аврупо ва маҷмӯаҳои шахсӣ маҳфузанд.
