Дар шаҳри Хоруғ рӯзи чоршанбеи ҳамин ҳафта бо иштироки 120 нафар вакилон аз ноҳияҳои ВМКБ конфронси ташкилоти Ҳизби коммунисти Тоҷикистон (ҲКТ) дар ин вилоят доир гардид.
Котиби якуми Кумитаи вилоятии ҲКТ дар ВМКБ, узви раёсати Кумитаи марказии ҲКТ Хусрав Рақамов ба «Азия-Плюс» дар ин робита иттилоъ дод, ки дар конфронс 9 нафар коммунистони вилоят ба анҷумани рӯзи 27-уми декабри пешазинтихоботии ҳизб вакил интихоб шуданд.
Ба гуфтаи ӯ, дар конфронс лоиҳаи барномаи пешазинтихоботии ҲКТ баррасӣ шуда, дар бораи таҷлили ҷашни 90-умин солгарди таъсиси ҲКТ ва ёдбуди хотири арбобони шоистаи ҳаракати коммунистӣ – зодагони ВМКБ, ки дар қайди ҳаёт нестанд, ибрози назар карда шудааст.
«Иштирокчиёни конфронс ба аҳолии мамлакат, аҳзоби сиёсӣ ва ташкилотҳои ҷамъиятӣ перомуни нигаҳдории сулҳу субот дар кишвар ва ба тамоми коммунистони ҷумҳурӣ оид ба муттаҳидӣ дар сафҳои ҲКТ ва ба ҷудоинадозӣ роҳ надодан муроҷиатномаҳо қабул карданд», – афзуд номбурда.
