Тибқи натиҷаҳои ҷараёни пешбарии номзадҳо ба вакилӣ дар палатаи поёнии парлумони Тоҷикистон, ки санаи 15-уми январ ба итмом расид, аз ҳавзаҳои якмандатии интихоботӣ барои ишғоли 41 курсии парлумон 212 нафар номзадҳо доваталабӣ мекунанд.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки аз ин шумор 108 нафар номзадҳо аз ҷониби аҳзоби сиёсӣ пешбарӣ шуда, 104 нафар тариқи худпешбарӣ номзадиашонро гузоштаанд.
«Шумори аз ҳама бештари номзадҳо ба вакилӣ дар ҳавзаи якмандатии интихоботии Шоҳмансури пойтахт ба қайд гирифта шудааст, ки 8 нафаранд», – иброз дошт вай.
Номбурда таъкид дошт, ки ҷараёни сабти расмии номзадҳо ба вакилӣ рӯзи 19-уми январ оғоз гардида, то 9-уми феврал идома меёбад.
Ёдрас мекунем, ки ба 22 курсии парлумон аз ҳавзаи ягонаи умумиҷумҳуриявӣ ҳизбҳои сиёсии Тоҷикистон 123 нафар номзадҳоро пешбарӣ карданд, ки 104 нафарашон аз санҷиши забони тоҷикӣ гузаштанд.
