Комиссияи марказии интихобот ва раъйпурсӣ (КМИР)-и Тоҷикистон имрӯз, 20-уми январ ба сабти расмии номзадҳои пешбаришуда ба вакилӣ дар палатаи поёнии парлумон оғоз мекунад.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки имрӯз сабти расмии номзадҳои тибқи рӯйхати ҳизбӣ пешбаришудаи Ҳизби демократ, Ҳизби сотсиалистӣ ва Ҳизби ислоҳоти иқтисодии Тоҷикистон аз ҳавзаи ягонаи умумиҷумҳуриявӣ дар назар аст.
Хотиррасон шуд, ки ба рӯйхати ҲДТ – таҳти роҳбарии раиси ҳизб Саидҷаъфар Исмонов 4 нафар, ҲСТ – таҳти роҳбарии раиси ҳизб Абдуҳалим Ғаффоров – 6 нафар ва ҲИИТ таҳти роҳбарии раиси ҳизб Олимҷон Бобоев – 6 нафар номзадҳо пешбарӣ шудаанд.
Бино ба иттилои манбаъ, имрӯз дар КМИР сабти расмии
28 нафар ҳайати нозирони
байнулмилалии Дафтари институтҳои демократӣ ва ҳуқуқи башари Созмони Амният ва Ҳамкорӣ дар Аврупо (ДИДҲБ/САҲА), ки аллакай дар шаҳри Душанбе қарор доранд, низ пешбинӣ шудааст.
