Рӯзи 29 январ дар ноҳияи Данғара 22 номзади Ҳизби наҳзати исломии Тоҷикистон дар имтиҳони забон, ки аз тарафи ҳавзаи маҳаллии интихобот бо ширкати мутахассисони забон аз шуъбаи маорифи ноҳия баргузор гардид, ширкат карданд ва аз ҷумлаи 22 номзад 10-тои онҳо бо шумули Камолов Хол, муаллими Эмомалӣ Раҳмон ноком шуданд.
Бино ба иттилои сомонаи расмии ҲНИТ, мутахассисони забон номзадҳои наҳзатиро бо суолҳое, мисли “Боби дуюми қонун дар бораи забони давлатӣ чист?”, синоними вожаҳои мураккаб ва ғайра пурсиданд.
Гуфта мешавад, ҳарчанд Камолов Хол, муаллими раиси ҷумҳур бемор буд, ӯ дар долони сарди биное, ки имтиҳони забони давлатӣ онҷо баргузор мешуд, ду соат интизор истод ва сабаби нокомии ӯро дар бад будани ҳусни хат эълон карданд. «Бори аввал аст, ки ҳусни хат ҳамчун меъёр дар комёб ё ноком шудан ба кор меравад», – омадааст дар хабар.
Зимнан зикр мегардад, ки ақомоти зидахл борҳо изҳор доштанд, ки имтиҳони забони давлатӣ тибқи талаботи қонун сурат мегирад ва ҳама гуна суистифода аз онро рад карданд.
